Lisenziyalaşma istehsalçı üçün beynəlxalq marketinqə daxil olmağın sadə yoludur. Bu zaman şirkət xarici bazardakı lisenziya alanla sazişə girir. Lisenziya alan haqq və ya qonorar ödənişləri müqabilində şirkətin istehsal prosesindən, əmtəə nişanından, patentindən, kommersiya sirrindən və ya digər qiymətli maddələrindən istifadə etmək haqqını alır. Beləliklə, şirkət xarici bazara az risk altında daxil olur. Eyni zamanda lisenziya alan sıfırdan başlamadan istehsal səriştəsi, yaxud tanınmış məhsul və ya ad əldə edir.

“Tokyo Disney Resort” “The Walt Disney Company”nin verdiyi lisenziya əsasında “Oriental Land Company”ə məxsusdur və onun tərəfindən idarə olunur. 45 illik lisenziya “Disney”ə lisenziya haqqı və parka daxilolmalardan, habelə qida və mal satışından faiz də qazandırır. “Coca-Cola” dünyanın müxtəlif yerlərindəki butulka doldurma şirkətlərinə lisenziya verməklə və onları məhsulu istehsal etmək üçün lazım olan siropla təchiz etməklə beynəlxalq miqyasda satış edir. Onun qlobal butulka doldurma tərəfdaşları Səudiyyə Ərəbistanının “Coca-Cola Bottling Company” şirkətindən Afrika pivə istehsalçısı “SABMiller”ə və İtaliyadan və Yunanıstandan Nigeriyaya və Rusiyaya qədər 28 ölkədə 593 milyon insan üçün 136 “Coca-Cola” brendi qablaşdırıb satan Avropa mərkəzli “Coca-Cola Hellenic”ə qədər dəyişir.

Lisenziyalaşmanın potensial əlverişsiz cəhətləri də var. Şirkətin lisenziya alan üzərində özünün fəaliyyət göstərəcəyi zaman olduğundan daha az nəzarəti olur. Bundan başqa, əgər lisenziya alan çox uğurlu olarsa, şirkət bu gəlirləri əldən qaçırmış olur və müqavilə sona çatdığı vaxt özü üçün bir rəqib meydana çıxa bilir.